هتكلم وهقول: يا ربى لك الحمد

Wednesday, 1 August 2007

يا ربى لك الحمد

من وقت لاخر .. لازم الواحد يشكر نعمة ربنا عليه
اصل نعم ربنا على الواحد كتيرة جدا .. ومهما عملنا مش هنقدر نشكر او نوفى نعم ربنا
فالحمد لله على نعمة السمع والبصر والدين والالتزام والاب والام والاخوان والاصدقاء

وان تعدوا نعمة الله لا تحصوها
فعلا مش هقدر احصى نعم ربنا على الواحد
تيجوا كده نعد كام نعمة من نعم ربنا علينا ونقول الحمد لله يا رب على النعم دى

الحمد لله .. فى الاول كده على نعمة الاسلام
الحمد لله .. على نعمة الالتزام مع الاخوان
الحمد لله .. على نعمة السمع والبصر والاحساس

الحمد لله .. على انى لغاية دلوقتى بلاقى المايه فى الحنفيه ومش بشرب مياه ملوثه
الحمد لله .. محدش من عيلتى تم اغتصابها وهى عندها 11 سنة
الحمد لله .. ان الواحد بلاقى رغيف العيش اللى من غير مسامير
الحمد لله .. طلعت فى بيت واسرة ومكنتش واحد من اطفال الشوارع
الحمد لله .. انى لسة طالب ولاقى شغل ومشفتش لسة وجع البطاله
الحمد لله .. ابويا معايا ومش معتقل ومش متاخد فلوسه ومش بيقولوا عليه ارهابى
الحمد لله .. محدش من اهلى من اسرى 76 اللى تخلت عنهم الحكومة
الحمد لله .. محدش من اهلى كانوا فى العبارة اللى غرقت
الحمد لله .. مش عايش فى قلعة الكبش وبيتى متحرقش ومتحوجتش للشقة بتاعت الحكومة
الحمد لله .. محدش من اهلى اتعذب فى اقسام الشرطة
الحمد لله .. متضربتش فى الانتخبات من البلطجية
الحمد لله .. انا واحد من المصريين القليلين اللى عايشين فى بلدهم كويسين

الحمد لله .. محدش من اهلى عالق فى معبر رفح ومحدش منهم لاجىء ولا حاجة
الحمد لله .. محدش من اهلى كان عضو مجلس شعب ورفعوا عنه الحصانة عشان مش عاجبه حال البلد
الحمد لله .. مضربتش فى مظاهرات ومكنش حد من اهلى من البنات اللى اتحرش بيهم
الحمد لله .. عامل مدونة وبتكلم وبقول اللى فى نفسى ومحدش بيقولى انت بتعمل ايه

الحمد لله .. الحمد لله .. الحمد لله

مش بقولكم نعم ربنا على الواحد كتيرة

الحمد لله على نعمه .. وربنا يزيد ويبارك

24 comments:

saiaf said...: رااااااااائع جدا جدا جدا البوست ده

و الله نعم ربنا كتير اوى علينا

و فى دعاااء انا بحبة جدا و بقولة فى اليوم يمكن اكتر من الكتيييير :d

(( يا ربى لك الحمد كما ينبغى لجلال وجهك و لعظيم سلطانك)); 1 August 2007 at 00:53
Unknown said...: الحمد لله فعلاً
إن تعدوا نعمة الله لا تحصوها

:); 1 August 2007 at 01:07
Anonymous said...: طيب انا بقي عمي مفقود في حرب 67

يارب لك الحمد كما ينبغي لجلال وجهك وعظيم سلطانك

بس تدوينة جمييييييييييييييلة; 1 August 2007 at 01:09
Anonymous said...: الحمد لله

Manas; 1 August 2007 at 01:21
Saif Allah said...: El7amed llah; 1 August 2007 at 02:47
رضوى said...: ماشاء الله

بوست جاامد اوى

اسلوبه جميل من حيث حمد النعمه بجد والتحسر على الحال العام

والصورة معبرة اوى عن المعاناة والدعاء

بورك قلمك; 1 August 2007 at 02:50
7amza said...: الحمد لله على البوست اللي ذكرنا بنعم كتيرة

- - -

ومدونة ممتازة يا ريس
وبالتوفيق
(:; 1 August 2007 at 03:40
بن توفيق said...: اااه والله يا سباف
دعاء جميل اوى

يا ربى لك الحمد كما ينبغى لجلال وجهك و لعظيم سلطانك

جزاك الله خيرا يا حبى

عموووووووووور
فعلا يا ريس
الحمد لله على نعم ربنا التى لا تعد ولا تحصى

مصراوى اوى
انا اكتر مصراوية منك .. مع ان عمك من اسرى 67
ربنا يكرمك .. ومقلتليش صحتك عامله ايه دلوقتى ؟

مانص
فعلا يا حبى
الحمد لله; 1 August 2007 at 09:45
بن توفيق said...: Saif Allah
اه والله فعلا .. الحمد لله

اختنا بحب الحق
ربنا يكرمكم يا رب ويعزكم
انا بقول الحمد لله ... والحمد لله على دى كمان اشمعنى هيا
ده كرم من ربنا انى كده
اما عن الصورة .. فانا حاسس بيها فعلا
ان مع كل ده بيقول يا رب لك الحمد

حمزة
الحمد لله انى كنت سبب فى تذكيرك بنعم ربنا
وربنا يكرمك ويعزك يا رب; 1 August 2007 at 09:48
فوضى منظمة said...: يا ربي لك الحمد قبل الرضا .. ولك الحمد اذا رضيت .. ولك الحمد بعد الرضا .. ولك الحمد ابدا ابدا; 1 August 2007 at 10:02
alzaher said...: مجرد بقاء المواطن المصري على قيد الحياة في عهد مبارك هو في حد ذاته نعمة إلهية وعملية نضالية
ملحوظة: يعني إيه "نعمة الإخوان"؟; 1 August 2007 at 17:36
آن الأوان said...: This comment has been removed by the author.; 1 August 2007 at 23:18
آن الأوان said...: السلام عليكم

الحمد لله على نعمه ان احنا بنحمده; 1 August 2007 at 23:27
moslem_fm said...: الحمد لله على نعمة الاسلام وكفى بها نعمة

جزاك الله خير على التدوينة الجميلة دى; 2 August 2007 at 00:39
بن توفيق said...: شاهنشى حبيبى
فعلا ... يا ربي لك الحمد قبل الرضا .. ولك الحمد اذا رضيت .. ولك الحمد بعد الرضا .. ولك الحمد ابدا ابدا

الظاهر
اهلا بيك فى مدونتى
وفعلا زى ما بتقول
بقاء المواطن المصرى لسه عايش فى ظل كل اللى بيحصله ده
فدى نعمة تستح قالحمد
انا بخصوص نعمة الاخوان .. فانا بحمد ربنا انى اتربيت فى وسط الاخوان
واتشرفت انى انتمى اليهم
ودى انا شايفها نعمة كبيرة .. بحمد ربنا عليها; 2 August 2007 at 01:27
بن توفيق said...: آن الاوان
وعليكم السلام ورحمة الله .. مرحبا بيك فى مدونتك
وفعلا الحمد لله على كل حاااال
ونشكر مرورك وتعليقك

moslem_fm said...
الحمد لله على نعمة الاسلام وكفى
بها نعمة

فعلا والله
الحمد لله حمدا كثيرا طيبا مباركا فيه; 2 August 2007 at 01:30
ahmed mefrh said...: بوست اكثر من رااائع اخى
و طريقه تقديمه جميله ايضا و سلسله
الحمد لله الذى جعلنى اقرا هذا البوست عن الحمد و يذكرنى به اخ مثلك

ابو مفراح; 2 August 2007 at 01:35
بحب الحرية said...: الحمد لله

:)
ربنا يكرمك; 2 August 2007 at 23:26
وائل_صح ولا غلط_ said...: لو انت ماحصلكش حاجه من اللي بتقول عليها دي يبقي انت اكيد مش عايش في مصر

واكيد اكيد عايش في المدينه الفاضله

البني ادم اللي عايش في مصر لازم يحصله علي الاقل تلات اربع حاجات من اللي انت قلت عليهم مش بيحصلولك

اللهم ادمها عليك وعلينا كمان نعمه واحفظها من الزوال; 2 August 2007 at 23:55
mo'men mohamed said...: الحمد لله فعلا على كل النعم دى
جزاك الله كل خير اخى
السلام عليكم; 3 August 2007 at 16:20
Monzer said...: (( يا ربى لك الحمد كما ينبغى لجلال وجهك و لعظيم سلطانك))

مقتبس من أول تعليق الأخ سيف; 3 August 2007 at 17:38
david santos said...: The purchase of weapons for Mubarak to the Bush terrorist will be for making peace, or will be for taking the American terrorism for the Egipto?

The great people of the Egipto that is intent.

Of these two cannot come nothing of good.

David Santos (Portuguese); 4 August 2007 at 00:21
noha said...: جميل جداً
تصدق حضرتك فكرتنى بحاجات مكنتش واخدة بالى منها

:)

الحمد لله
ربنا يعزك; 4 August 2007 at 09:50
Bent Elqran said...: الحمد لله إنى لسه عايشه لحد دلوقتى وبرد فى البوست ده

والحمد لله على لمة العيله

..........

عذرا على الغيبه الطويله دى بس كان فى مشاغل كده والحمد لله عدت بسلام

وجزاك الله خير الجزاء وأدخلك الجنه مع من تحب; 7 August 2007 at 03:56