Tuesday 21 August 2007

ارفعوا ايديكم عن الاخوان




من اكتر من 70 سنة والاخوان بيتم اعتقالهم

الامام البنا .. اعتقلوا اخوانه منه عشان يسهل عليهم قتله
جمال عبد الناصر .. اعتقل الاخوان وحطهم فى السجون
السادات .. عمل نفس الاعتقالات بس بصورة اشد

خلال الـ 3 سنين اللى فاتوا تم اعتقال ما يقرب من 100 الف واحد من الاخوان

سواء فى
مظاهرات الاصلاح
ولا فى انتخابات الرئاسة
ولا فى انتخابات مجلس الشعب
ولا فى انتخابات الشورى
ولا فى تمديد الطوارىء
ولا فى عرض الازهر
ولا فى قرب اعلان الحزب


وقبلهم كتير .. واعتقالات اكتر
ده غير 5 محاكمات عسكرية فى العشرين سنة اللى فاتت .. للاخوان بس

كتير اوى كده بصراحة .. كتير على الاخوان وكتير على قيادات الاخوان اللى بيتم اعتقالهم
عندى يقين تام .. ان كل ده ان شاء الله فى ميزان حسناتهم


مش عارف ايه حكاية الدكتور عصام .. انا حسيت ان الحكومة دلوقتى
لما تحب تلوى دراع الاخوان .. تعتقل الدكتور عصام
طب ذنب اهله ايه وذنب اولاده ايه
اكيد هما محتسبين كل ده عشان خاطر ربنا .. ودعوة الاسلام
بس كده كتير .. الراجل مقعدتش 9 شهور فى بيته مع اهله
طبعا ده غير المحاكمة العسكرية اللى اتحكم عليه فيها بـ 5 سنين
ربنا يردك يا دكتور عصام لاهلك واخوانك



لا .. والمرة دى مش الدكتور عصام وبس
ده كمان الدكتور سناء ابو زيد
اللى هو حما ابراهيم عصام ابن الدكتور عصام
الراجل الطبيب التربوى
اللى اكن له كل تقدير وكامل الفضل عليا وانا صغير وانا كبير
ربنا يردك سالم غانم لينا يا دكتور سناء

غيرهم كتير .. الاستاذ سيد نزيلى والاستاذ مقبل والدكتور احمد عمر

ليه كل ده .. كل ده عشان الحزب ؟
كل ده عشان الاخوان قالوا انهم هيعلنوا عن الحزب الجديد بتاعهم الشهر الجاى







لا .. مش كده وبس
ده غير المحاكمات العسكرية والمهزله اللى بتحصل فيها
منظمات العالم كله .. بتقول ان المحاكمة دى باطله
واحنا بس اللى مقتنعين انها سليمة ودستورية
ده غير ان حتى ممثلى الامم المتحده منعوا من الدخول .. وسلامات يا شرعية

كل ده طبعا غير الدكتور غزلان و القصاص
وغيرهم كتير من الاخوان اللى جوه المعتقل
والحكومة مش عايزة تطلعهم



بحب نشيد حلو قوى .. اسمه احنا الاخوان

احنا الاخوان الله اكبر .. اقسمنا يمينا لن نقهر
وكتاب الله بايدينا .. سنخوض اليابس والاخضر



انا لما بقول ارفعوا اديكم عن الاخوان .. مش بستنجد عشان ترحموا الاخوان
ومش طلب ورجاء وكده عشان ترحموا الاخوان وترفعوا ايدكم وبلاش تعتقلوهم

انا بقولكم ارفعوا ايديكم عنهم


سبوهم فى دعوتهم
سبوهم فى طريقهم اللى هما عايزينه
سيبوا الاباء لابنائها
سيبوا الرجال لاهلهم
سيبوا دعوة ربنا تسرى فى الشعب المصرى
سيبوا الاسلام ينتشر
سيبوا الاصلاح .. ومتقفوش قدامه





الاخوان مش بعبع .. عشان اللى بتعموه فيهم ده

عايزين تعرفوا الاخوان

نحن بالاسلام لكم اخوان
تجدونا حيث المسجد والقرآن
تعرفونا بشعار الايمان .. بالمصحف يحرسه سيفان
الله غايتنا .. الرسول قدوتنا ..القرآن دستورنا
الجهاد سبيلنا .. الموت فى سبيل الله اسمى امانينا

Wednesday 8 August 2007

تاجين .. يضيعوا النكد ده



وصلة النكد والغم والحزن زادت فى المدونة .. انا حاسس كده
لدرجة انى مش عايز ادخل المدونة دى تانى من كتر النكد اللى فيها
ده ناقص اعمل على بابها صوان عزا واتقبل فيه العزا وخلااااص

لا يا جماعة .. عمر ما كان الكلام كله حزن
انا ممكن اتكلم واقول وفى نفس الوقت .. اتكلم فى حاجة تفرح

اكتر حاجة فرحتنى اليومين اللى فاتوا .. التاج " لا هما تاجين مش تاج واحد " اللى بعتهولى امام الجيل


وشفته من 3 ايام
وقررت ساعتها انى انزله فى اسرع وقت
بس هو يعزرنى بقى .. على التأخير
انت عارف الدنيا مشاغل ... ونفسى بقى يا عم اشوفك ونتعرف اكتر

الاسئلة اهى .. ويا رب الاجابات تعجبكم


ما رأيك في جريده الدستور ؟
جريده تسعى للافضل .. ولكنى اشك انها ستصبح كذلك بحالتها هذة
الدستور عايزة تبيع بشوية الاخبار والكلام اللى بتحظها فى صدر الصفحة الاولى
ودى انا مش شايفها صحافة تميز .. او صحافه تؤدى الى الافضل

ما رأيك في شويه المدونات دي ..( أنا إخوان .. إبن أخ .. حلم الحريه .. مش حاسكت .. جهاد المصري ) ؟
ليه يا عم الاحراج ده
انا اخوان .. بعتبرها مدونة اخبار .. صفحة اخبار من مصادر منعم الاخوانية ومعارفه الصحفيه
ابن اخ .. مدونة تثقيفية .. بحس وانا داخلها انى داخل سنتر عشان اخد دورة او استمع لندوة
حلم الحرية .. مدونة منظمة .. صاحبتها عارفه عة بتقول ايه ؟
مش حاسكت .. بالحاء اهوه عشان مش تزعل .. مش حاسكت ده قرينى
انا هتكلم وهقول وهو مش حيسكت
جهاد المصرى .. مدونة تحب انك تقعد قدامها تقرأ فيها

هل بعد قراءتك للإجابتين إللي فاتوا .. حسيت إن أنا أيه ؟؟ ولا تنسي الصدق ؟
واحد عادى باعت البوست ... بينى وبينك كده عشان انت قلت لا تنسى الصدق
بينى وبينك من غير ما حد يسمع او يشوف
انت اخوان ... صح ؟
اوعى تقولى ... اااااااااااه

هل تثق في جريده الدستور ؟
بعض صحفييها بيتكلموا كلام جميل وكلام ثقه
وناااس تانية .. ربنا يسامحهم بقى .. وللاسف دوول الاكثر
نفسى اشوفق الدستور اليومية .. زى الدستور الاسبوعيه اللى كانت من سنتين مثلا

أنا بحبكو في الله .. فهل تحبونني ... ولا تنسوا الصدق ؟
احبك الله الذى احببتنا من اجله ... بس انت خايف ليه مش هنعملك حاجة

هل تعمل في السياسه والعمل العام أكثر من الربانيات والروحانيات ؟
اصل النقطة ان الاتنين بيكملوا بعض اوووى بمعنى ان لما توصل لمرحلة تحس انك تعبت اوى من الشغل


هتلاقى الروحانيات وكدا بتساعدك تانى تجدد نيتك وترجع اقوى
والعكس
فبحاول دايما اوازن بين الاتنين
ولو الواحد وصل لمرحلة الموازنة دى بجد ...هيجمع باذن الله دين ودنيا

هل الدستور تحب الإخوان .. ولا بتستغلها ؟
انت بتقطع ليه .. بين كل سؤال وسؤال عن الدستور تحطى سؤال فى النص
ما تسأل اسئلة الدستور كلها ورا بعض


بص يا عم .. الدستور جريدة ماشية فى خطين
خط حريات الاخوان وخط حريات الاقباط
بتستفاد وبتبيع جدا .. وهى بتتكلم على الجانب ده
مش هقدر اقول انها بتحب الاخوان .. بس اقدر اقول انها ممكن بتستغل الاخوان عشان تبيع


التاج التانى ... عشان عمو امام الجيل مش يزعل
بس بجد .. التاجين كتار اوى


اسم مدونتك ؟
هتكلم وهقول
بص على البانر كدا ..... شغل سياف مش اى حد

لماذا اخترته .. وماهي نيتك من وراء اختياره ؟
حسيت انه ملائم جدا لشخصيتى .. ولازم جدا فى الوقت الحالى

هل فكرت في إغلاق مدونتك ؟ والسبب ؟
فكرت .. وساعتها كنت هشيل كل البوستات الموجوده
وان عملتها هيكون برا باهلى وخصوصا والدى
لكن اقفلها عشان ضغط ولا حاجة من اى حد تانى .. فدى انا اشك انى اعملها


صورتك في المدونة ورمزيتها ؟
صورتى فى المدونة صورة ليا .....كنت مروق بقى
وقاعد على شط البحر وكده .. من احلى الصور اللى اتصورتها

لماذا دخلت عالم التدوين من الاساس ؟
زى ما قلت قبل كدا عشان انسى السنة اللى فاتت بكل احداثها الغير سارة على المستوى الدعوى والاسرى والشخصى ..انسى سلبياتها وسلبياتى معها.. انسى اخطائها واخطائى معها.....والى حد كبير عشان عايز اتغير
كنت عايز اشوف سلبياتى بعين خارجية ...عيون ناس بتحبى مش عشان مصلحة
عندى الرغبة فى التغير بس عايز حد يعيننى


ارجع لبوست بن توفيق فى ذمةالله وانت تعرف

وبعد كده على طووول .. حسيت انى لو دخلت التدوين بقوة .. هيبقى ليا دور
سواء بين مرتادى المدونة او بين اصحابى وعشان كده كملت

جمله قيلت لك فى وصف مدونتك ؟
الكل بيقول عليها مدونة جميلة ورائعة والكلام الجامد اللى انت عارفه ده
لا والله مش فاكر .. اسأل الناس اللى بيزوروا المدونة وشوف التعليقات اللى بيعلقوها
وانت تعرف هما بيقولوا ايه على المدونة

التعليقات بالنسبه لك .. اهميتها ؟
طبعا حاجة جميلة ان الواحد يشوف نفسه وكلامه بعيون غيره ورأيهم فيه
واوقات كمان بيكون فى تعليقات جميلة اوى بتصبر الواحد وتشجعه
وكمان بنشكح لما بلاقى ناس كتير ردوا عليا
بحس ساعتها ان الموضوع لقى تجاوب بين الناس .. ولقى حب وتأثير فى الناس لدرجة انهم مش قرؤا وبس .. دوول علقوا كمان
بالاضافة انها بتكون فرصة لان الواحد يعرف مدونات تانية وفكر تانى يقرأه

احلى بوست كتبته ...ضع اللينك ثم اذكر لماذا ؟
هو بوست انا شيلته من على المدونة .. برا بوالدى
لكن ياتى بعده على طووول البوست اللى كنت ببارك فيه لاختى
عشان نجحت وجابت جيد جدا
وبعديهم بوست انت خطير ابعد عنى
وبوستات كتير .. اصل انا مش بنزل على المدونة حاجة
الا لما احس فعلا انها مالية تفكيرى وداخله دماغى
وانت شوف المدونة واتصفح فيها
مش هجيبلك لينكان انا

أفضل مدونة قرأتها ؟
انت بتحرجنى ولا ايه
والله مدونات كتيرة جميلة وكويسة ولذيذة
بس اخاف لو قلتها هنسى حد
على العموم انا عندى فى الفيفورت اكتر من 150 مدونة
اللى بتلقينى بشارك فيها بتعليقات .. هى دى المدونات اللى انا بحبها

حد قل أدبه فى التعليق إيه رد فعلك ؟
لا مش وصلت لقله ادب يعنى
بس بيكون اتلباس فى الاراء او كدا
او تعبير عن الاراء بطريقة غير لائقه
رد الفعل انى برد على التعليق اللى اتكتب زى اى تعليق بيترد عليه
بس بكل زوق وادب واحترام


أسوأ بوست أسوأ مدون ؟
لا دووول بقى كتير .. للاسف التدوين دلوقتى بقى موضة
وبقى كل واحد دلوقتى بيعمل مدونة
دى فى حد ذاتها ظاهرة كويسة ان الناس تخرج اللى عندها
بس بتضيع ناس ممكن تكون بتعرف تدون
يلا الحمد لله ... مش هقول طبعا على اسماء
انا عارفك عايزك تجرنى عشان اقولك اسماء ناس .. بس انا ذكى ومش هقولك برضة

هيحصل ايه لإيميلك لما تموت ؟
هيروح للورثة طبعا .. وهما يقسموه بقى
انت بتتكلم ازاى

اديت الباسورد لمين؟
لخطيبتى ... عارفها

كانت إيه طبيعة علاقتك بيه ؟
ما احنا قلنا بقى .. خطيبتى
يعنى واحدة باذن الله هتبقى مراتى

ادعيلى انت بس وقول يا رب

اسمك؟
اسلام .. اسلام توفيق

المشهور بيه وسط اصحابك ؟
بن توفيق.... الاسم اللى كتير بينادونى بيه
وبحب ان الناس تنادينى بيه

شخصيتك نوعها إيه ؟
شخصية بتحب كل الناس وبتحب اوى تدى من غير مقابل .. لما بتحب بتحب بجد
ممكن نقول عصبية شوية ... بس الحكاية دى قلت كتييير
الى حد ما بحط لنفسى قيود معينة فى حاجات معينة .. .بس الحكاية دى بتريحينى
بحب الصراحة دايما فى كل حاجة ...
شخصية بتفكر كتير ....بتلوم نفسها دايما خشية من ربها
اى خدمة .. شركتلك نفسى اهوه

السفر بالنسبة لك ؟
حاجة جميلة وممتعة وخصوصا لما بتكون مع الخماسى وتتفرج على شريط عن تسونامى واحنا رايحين اسكندرية

وقت فراغك بتعمل فيه إيه ؟
بحاول يكون مع اهلى عشان مش بقعد معاهم من كتر الشغل والنزول طول اليوم
والى حد ما برضو التواصل مع الاصدقاء وكدا
ده غير ادمان النت اللى انا فيه

المود بتاعك ؟
بفضل الله بكون مستريح وفى هدوء مع نفسى كدا فى معظم الاوقات رغم المشاكل اللى بتحصل او كدا
بس اوقات الموضوع بيزيد عن حده
بس الحمد لله مبتسم وبحس ان الابتسام ده بيخلى الواحد يدخل قلوب الناس كده وبيكون فى قبول جميل اوى

الصفات اللي أخدتها من بابا ؟
القيادية شوية ... بس ممكن تقول انها بطريقة مختلفة


الصفات التي أخدتها من ماما ؟
الحنية والطيبة الى حد كبير

اكتر ست حاجات بتكرهها ؟
الكدب
اللف والدوران ... وبتبقى مكشوفة اوى
تنشيف الدماغ والثبات على الرأى الغلط .. على فكرة انا فيا موضوع تنشيف الدماغ ده
طبعا اللى بشوفه فى الشارع المصرى دلوقتى
السلبية وكلمة انا مالى ومليش دعوة .. الله يلعنهم
تشويه صورة الاسلام من المسلمين نفسهم بقصد او من غير قصد

اكتر ست حاجات بتحبها ؟
الله عز وجل و سيدنا محمد وباقى الرسل والصحابة
الاخوان .. ودعوة ربنا
اختى وخطيبتى ان شاء الله .. طبعا ابويا وامى دوول مفهمش كلام
الاطفااال... انا خاطب كل بنات العيلة والمعارف والاصحاب الصغار
الاناشيد الاسلامية
واخيرا .. بحب الحرية وبحب الحياة


الانترنت بالنسبه لك؟
ادماااااااان
يعنى وقت كبير جدا بقضيه على النت
يعنى شغل ودعوة وثقافة وبذل وجهد وكده



هتمرره لمين ؟
امرره لمين .. لمين

بصوا يلا يا تاج روح على

قضيها ـ شقلبان
بحلم ـ بغنى ـ اختنا اسماء
العقوبى ـ عز حبيبى
دروب الحياة ـ الانتيمتان بحب الحق وبحب الحرية
عدى النهار ـ العريس محمد
ستوب هير ـ الاخت كيلوباترا

Saturday 4 August 2007

اخبار تعكنن



امريكا تسلح معاونيها واتباعها وحلفائها فى الشرق الاوسط
وطبعا ده كله بمباركة الشقيقة اسرائيل التى تقول
انها ليس لديها مانع ما دامت هى تتفوق عليهم عسكريا

اسرائيل بتمن عليكم يا عرب


السعودية معندهاش جيش اصلا يستخدم الاسلحة الجديدة بتاعت امريكا دى
امال هى جايباها ليه ؟

تكنش عشان خاطر القواعد العسكرية الامريكية فى السعودية


راح 22 كورى افغانستان بهدف تنصير المسلمين
اتقبض عليهم من طالبان واعدم اتنين
وطالبان وافقت اهى الحمد لله للجلوس على مائدة تفاوض
بس هيتفاوضوا على ايه ؟

على فوج التنصير ولا على قوات كوريا فى افغانستان


المواطن المصرى بيموت عشان بيقول انا عايز اشرب
امال لو قال انا عايز اكل بقى .. او عايز اصيف هيتعمل فيه ايه

ولا تعليق


عالقى رفح لسة فى ازمتهم
والحكومة محدش فيها اتحرك
وكل اللى اتحركوا هما لجنة الاغاثة الانساية بتقابة الاطباء
ولجنة الاغاثة والطوارىء باتحاد اطباء العرب

ولما اتحركت الحكومة قالت انها تستعد لعبور 1000 عالق من ممر العوجة
طبعا عشان الالف دووول ينموا لـ 11 الف معتقل فى السجون الاسرائيلية

هو معبر رفح مش هيتفتح ولا ايه ؟


الاستاذ ميلاد حنا بيقول ان جمال مبارك مش هيحكم .. وان التوريث هيرفضة الشعب
وان الاخوان اقوى من الحكومة وتواجدها اكبر من تواجد الحزب الوطنى

بس تفتكروا الراجل جاب الكلام ده منين


الرئيس مبارك امر بعدم بيع البنك الاهلى وبنك مصر
مكنش الامر ده كان شمل باقى القطاع العام اللى تخصص واتباع برخص التراب

ولا انا مالى .. هى كانت بلدى


كفاية كده .. انهاردا
عشان ميحصلكوش حاجة .. وتقعوا منى

Wednesday 1 August 2007

يا ربى لك الحمد


من وقت لاخر .. لازم الواحد يشكر نعمة ربنا عليه
اصل نعم ربنا على الواحد كتيرة جدا .. ومهما عملنا مش هنقدر نشكر او نوفى نعم ربنا
فالحمد لله على نعمة السمع والبصر والدين والالتزام والاب والام والاخوان والاصدقاء

وان تعدوا نعمة الله لا تحصوها
فعلا مش هقدر احصى نعم ربنا على الواحد
تيجوا كده نعد كام نعمة من نعم ربنا علينا ونقول الحمد لله يا رب على النعم دى

الحمد لله .. فى الاول كده على نعمة الاسلام
الحمد لله .. على نعمة الالتزام مع الاخوان
الحمد لله .. على نعمة السمع والبصر والاحساس

الحمد لله .. على انى لغاية دلوقتى بلاقى المايه فى الحنفيه ومش بشرب مياه ملوثه
الحمد لله .. محدش من عيلتى تم اغتصابها وهى عندها 11 سنة
الحمد لله .. ان الواحد بلاقى رغيف العيش اللى من غير مسامير
الحمد لله .. طلعت فى بيت واسرة ومكنتش واحد من اطفال الشوارع
الحمد لله .. انى لسة طالب ولاقى شغل ومشفتش لسة وجع البطاله
الحمد لله .. ابويا معايا ومش معتقل ومش متاخد فلوسه ومش بيقولوا عليه ارهابى
الحمد لله .. محدش من اهلى من اسرى 76 اللى تخلت عنهم الحكومة
الحمد لله .. محدش من اهلى كانوا فى العبارة اللى غرقت
الحمد لله .. مش عايش فى قلعة الكبش وبيتى متحرقش ومتحوجتش للشقة بتاعت الحكومة
الحمد لله .. محدش من اهلى اتعذب فى اقسام الشرطة
الحمد لله .. متضربتش فى الانتخبات من البلطجية
الحمد لله .. انا واحد من المصريين القليلين اللى عايشين فى بلدهم كويسين
الحمد لله .. محدش من اهلى عالق فى معبر رفح ومحدش منهم لاجىء ولا حاجة
الحمد لله .. محدش من اهلى كان عضو مجلس شعب ورفعوا عنه الحصانة عشان مش عاجبه حال البلد
الحمد لله .. مضربتش فى مظاهرات ومكنش حد من اهلى من البنات اللى اتحرش بيهم
الحمد لله .. عامل مدونة وبتكلم وبقول اللى فى نفسى ومحدش بيقولى انت بتعمل ايه

الحمد لله .. الحمد لله .. الحمد لله

مش بقولكم نعم ربنا على الواحد كتيرة

الحمد لله على نعمه .. وربنا يزيد ويبارك