Tuesday 24 July 2007

تجربة انتخابية ناجحة

تجربة حزب العداله والتنمية التركى
بيضرب افضل الامثال للحزب اللى بينزل وسط شعبه
وبيأخذ الحكم والوزارة باغلبية حقيقية عن طريق انتخابات نزيهة




شوفوا كده الصورة دى وتخيلوا معايا
ازاى الشعب حريص على التصويت والمشاركة السياسية برأيه فى الانتخابات
مش مهم هو بيرشح مين .. المهم انه حس انه ليه قيمه
وراح صوت فى الانتخابات



اب بيزرع فى ابنه من هو صغير .. ازاى يكون ايجابى
وازاى يكون ليك صوت انتخابى
ولازم تشارك فى صنع قرار وطنك




فوز ما يقرب من 26 سيده فى الانتخابات التركية من حزب العدالة والتنمية
خير دليل على ان الاسلام مش بيضطهد المرأة
ومش بيخليها امة وجارية وكده
بل بالعكس هو رافعها لتصل اهوه الى المراكز القيادية


الاسلام المعتدل مش ارهاب
رجب طيب اروغان مش ارهابى عشان زوجته محجبه
ومش ارهابى عشان حماس باركت نجاح حزبه
ومش ارهابى عشان المرشد بعتله برقية تهنئة


اردوغان فى ظل كل هذا النجاح مش عدو التقدم ومش عدو الاتحاد الاوروبى
لكن هو بيشوف شعبه عايز ايه .. وبيعمل المستحيل عشان خاطر شعبه
بالعكس .. اول ما اعلنت النتائج قال انه هيسعى جاهدا للانضمام للاتحاد الاوروبى
يعنى واحد عايز اصلاح .. وبيسعى اليه وبينفذه

احلى سلام لتركيا .. ولتجربتها الديموقراطية

وانتخابتها النزيهة

Wednesday 18 July 2007

خواطر من الهايكستب

تردد كثيرا فى كتابة موضوع عن اللى حصل فى الهايكستب
يمكن عشان الكل عامل التغطيات دى .. ويمكن عشان حديث الانترنت دلوقتى
والمواقع الاخوانية والمدونات اللى بتحمل نفس الفكر بتكلم عن الموضوع ده
فقلت انا مش هضيف جديد
لكن فكرت فى فكرة تانية .. فكرة انى اقول خواطر على اللى شفته هناك
هى الخواطر والاحاسيس اللى الواحد عاشها هناك .. كتيرة جدا
انا هأخد منها تلات او اربع خواطر بس


نمت ليلة المحاكمة بعد الفجر .. وامى بتصحينى الساعة 7 وانا تقريبا مش قادر
والشيطان بيلعب فى دماغى وبيقولى لأ مترحش
هتروح تعمل ايه .. تعب وحر وشمس ومصاريف
بس الواحد جه فى بالى حديث النبى صلى الله عليه وسلم
من نصر مسلما فى موطن يحب فيه نصرته .. نصره الله فى موطن يحب فيه نصرته
حسيت بالمعنى ده
وده اللى خلانى اقوم بسرعة من على السرير وانزل واروح


وانا رايح وانا راجع تعبت كتير فى المواصلات
اكتر من ساعتين فى الطريق كتير جدا
ده غير المنظر اللى انتو شايفينه فى الصورة ده
وانا متعلق كده .. كنت بفكر فى اهالى اخواننا المعتقلين
يعنى يخرجوا من بيتهم الساعة 7 ويرحوا الساعة 11 كل ده عشان اباؤهم بيقولوا ربى الله
فى ظل الحر والصحرا اللى هما فيها والضغط النفسى اللى عليهم
لكن
وَلاَ تَحْسَبَنَّ اللّهَ غَافِلاً عَمَّا يَعْمَلُ الظَّالِمُونَ إِنَّمَا يُؤَخِّرُهُمْ لِيَوْمٍ تَشْخَصُ فِيهِ الأَبْصَارُ
ونصر الله قريب باذن الله





انس مالك قابلته يوم المحكمة وكان شكله حزين جدا
وعاشة تروح للمحامى تقوله عايز ادخل ابوس بابا واحضنه
والمحامى يقولها اللى بيدخل جوه القفص مش بيطلع .. تقوله مش مهم
المهم افضل مع بابا .. وحشنى حضنه


انا شفت ناس جاية من البحيرة
وناس جاية من الزقازيق
وناس جاية من المنوفيه
وناس جاية من الفيوم
وناس جاية من الاسكندرية
وناس جاية من القاهرة
واكيد هتلاقى نااس كتير جاية من حتت كتير
ناس جايه وعارفه انها عمرها ما هتدخل قاعة المحكمة
ناس جاية وعارفه انها هتقف فى الشمس
بس جايين .. عشان يقولوا لأ لازم للظلم نهاية
ونصر الله قريب ان شاء الله




اخر حاجة .. المدونين
اتشرفت فعلا لما قبلت كل المدونين دووول موجودين فى هناااك
سواء اللى جاى عشان المحاكمة او اللى جاى عشان المدون خانه
فرحان جدا .. انى شفت المدونيين دووول كلهم
وان شاء الله نلتقى قريبا جدا

Wednesday 11 July 2007

اختى نجحت

بقالى كتير شادد السلخ هنا فى المدونة
اخر اربع بوستات .. دعوة الى الشد والعصبية والكلام الكبير ده
ايه المانع بقى انى افرح شوية .. واتكلم عن حياتى الشخصية
هى مش اسمها مدونه شخصية ولا ايه



جاى انهاردا افرح معاكم .. وافرح بصفه خاصة مع اختى حبيبتى
اصل هى اخت واحده اللى طلعت بيها من الدنيا .. معنديش غيرها
ابويا وامى مجبوش غير اتنين انا وهى وبس

اختى دى بتمثلى اكبر حاجة فى حياتى .. هى الاقرب ليا بين كل الناس
حتى هى اقرب من كل اصدقائى .. بما فيهم الخماسى
اللى بعتبر كل واحد فيهم اخ حقيقى ليا

اول ما تحصلى حاجة ... بجرى على طول عليها احكيلها واشتيكلها واخد رأيها
وهى برضة .. ازعم انها تعتبرنى اقرب شخص ليها
حتى انى اقرب اليها من اصحابها
والدى طول عمره مربينى انا وهى ان محدش يحب حد اكتر من التانى
يعنى بيقولى يا اسلام متحبش حد فى الدنيا دى اكتر من اختك
وبيقولها هى برضة متحبيش حد فى الدنيا كلها اكتر من اخوك
ده احنا اللى اتربينا عليه .. عشان كده طلعنا مع بعض كده



خرجتونى من الموضوع الاساسى الله يسامحكم
انا جاى انهاردا اقول لاختى

الف الف مبروك على النجاح والتفوق
اختى الحمد لله نجحت وجابت

جيد جدا

وطالعة دلوقتى سنة تانية


يلا الكل يباركلى .. لان نجاحها يعتبر نجاح ليا
على فكرة انا الحمد لله نجحت .. سمعت كلمة ناجح اخيرا الحمد لله
بس نجاحها هى بالنسبة لى .. كان شىء تانى طبعا

الف مبرووك يا اختى يا حبيبتى

Saturday 7 July 2007

صبحى بيتكلم صح

بقالى 4 ايام عايز انزل بوست جديد .. ومش عارف
ومش عارف ليه انا مش عارف انزل البوست الجديد

الفكرة بتاعته متبلورة فى دماغى تقريبا من اسبوع .. لغاية ما جت اللحظة
اهى الحمد لله انى اكتب البوست ده وانزله

كلنا شفنا اللى حصل لمصور قناة الاقصى وهو بيغطى توغل القوات الاسرائيلية المحتله
لمنطقة البريج وسط غزة
واللى مشافش .. يدخل هنا اهوه ويشوف



وده اللى كنت عايز اتكلم عنه

صرخ محمد صبحى فى مسرحية سكة السلامة بيتكلم عن السلام وبيقول
" احنا مش عايزينه .. احنا اللى قدمناه .. احنا اللى بدأنا .. خدنا من وراه ايه "


وبعد كده جت فى بالى صورة الشهداء .. اى شهيد
سواء شهيد مصرى على الحدود .. او شهيد فلسطينى
فتحاوى كان او حمساوى

وتيجى برضة فى دماغى كلمة محمد صبحى فى نفس المسرحية بيقول
" ملعون ابو ده اتفاق لو اللى ماتوا دووول كان السبب "

ها يا مسلمين .. نحط ايدينا فى ايدهم بالسلام
نحط ايدينا فى ايد مين
اليهود هم اليهود .. قتلوا الانبياء ونقضوا العهود
ده اللى كانوا بيربونى عليه وانا صغير .. هتتغير التربية دى دلوقتى
تطبيع وسلام .. على اى اساس

انا مش عارف مغرم ليه بمسرحية سكة السلامة .. لكن قال فيها برضة محمد صبحى
تخيل انك قاعد فى شقه انت ومرتاك وعيالك .. وجه واحد بلطجى طلعلك
ضربك واعتدى على مراتك وقتل فى نص ولادك .. وطردك من الشقه وشردكم
وبعد كام سنة كده .. سنين فاتت
جه صاحب العمارة حب يجمعكم مع بعض عشان يشيل العداوة بينكم .. قعدكم وصالحكم
كانت النتيجة .. انه قعدك فى اوضه من الشقة بتاعتك
وهو برطع فى بقية الشقة
ومطلوب منك تطلع تقوله صباح الخير وتقوله مساء الخير
ومجبر تاكل معاه وياكل معاك
ومجبر يعتدى على مراتك ويقتل فى ولادك ويضربهم
يبقى فين كرامتك بقى


انا مش هعلق اكتر من كده .. حماس بتقول لا اعتراف بشرعية اسرائيل
والعالم كله بيحاربها .. عشان هى حكومة مسلمة وبتقول لأ
وفتح مش مادة ايديها بس .. دى ماده كل حاجة بكل التنازلات
ومش مستعده ان ولادها يموتوا وبس .. دى مستعده لكل حاجة


يا ترى مين فيهم اللى غلطان .. انا عارف الاجابة .. بس عايز اعرفها منكم انتوا