Sunday 18 November 2007

اعتذار وتاج ووعد

بصراحة انا مش عارف ابدأ ازاى .. انا بقالى اكتر من شهرين مش بدخل المدونة
مش بدخل بمعنى مش بدخل .. يعنى لما بيجيلى تعليق ولا حاجة بقراه من على الميل
حتى مش بدخل اشوفه من على المدونة

تصدقوا انى كنت ناسى اليوزر بتاع الاكونت بتاعى كان ايه ؟

انا بجد بعتذر لكم عن الفترة اللى فاتت .. اللى فكرت فيها بالعودة للمدونة اكثر من مرة وبأكثر من موضوع
ولكن صدقونى ضيق الوقت .. وانشغال الشديد وتعبى وزهقى من الكتابة .. خلتنى ابعد عن المدونة
وبصراحة كنت مستنى حاجة تجبرنى على حكاية الرجوع دى .. وسبحان الله .. يجيى التاج ده
عشان يجبرنى انى ادخل المدونة وارجعلها تانى

التاج ده جالى من الاخت اسماء من مدونة بحلم
قالولك اختار عصر من عصور مصرعلشان تعيش فيه تختار عصر اي حاكم ؟
ياااااه اختار العصر اللى قبل نزول الدعوة مباشرة وفترة نزول الدعوة على النبى محمد صلى الله عليه وسلم
واكون من الناس اللى آمنت بالنبى وصدقته ونصرته

اول اولويه في حياتك عيلتك ولا شغلك ولا اصحابك ؟
الكلام النظرى .. عيلتى طبعا واللى بسعى جاهدا انهم يكونوا كده
بعد كده اصحابى وشغلى
لكن التنفيذ بيخلى دعوتى وشغلى فى البداية
وبعدهم عيلتى واصدقائى

ايه اكتر حاجه بتحبها في رمضان ؟
تجمع الناس ووحدتها
سواء على الفطار
فى صلاة الفجر
فى التراويح


اوصف اجمل افطار ممكن تفطره ؟
الفطار اللى اكون فيه مع حد بحبه
او الفطار اللى بكون فيه مع الاخوان .. دول من الناس اللى بحبهم .. بس افطارهم بيبقى له طعم خاص


لو انت حاكم علي مجموعه من الافراد حتكون عادل ؟ طب هتتأ كد ازاي انك حاكم عادل ؟
بحاول اكون عادل بقدر الامكان
انا بحاسب نفسى .. ممكن ابقى اوريك محاسبتى لنفسى وصلت لايه
لكن بجد لو حد عايز يعرف هكون عادل ولا لأ
يقع تحت ايدى وانا هوريه


مين اكتر اعلامي في مصر بتحترمه ؟
ليه الاحراج ده
اظن انك لو كنت سألتنى عن اللى مش بحبهم
كنت جاوبت على طول .. بس هو الاستاذ احمد منصور وحمدى قنديل اكثر من احترمهم
ده فى المجال الاعلامى .. فى المجال الصحفى بقى الدكتور فهمى هويدى

لو ممكن تشتغل شغلانه تانيه كنت تتمني تبقي ايه ؟
طيب هو حد عارف شغلانتى الاولانية ايه عشان اتمنى اشتغل شغلانه تانية
انا شغال دلوقتى فى مجال الصحافة
ولو شغلانه تانية يبقى اشتغل رئيس تحرير او رئيس قسم على الاقل
معلش يا استاذ عز

ايه تاني بلد تتمني تعيش فيها بعد مصر ؟
انا مش متخيل انى اعيش بعيد عن مصر
مصر دى عشقى .. لكن لو بلد تانية تبقى فلسطين

اوصف ترتيبات اجمل فرح ممكن تحضره؟
كنت بتكلم من يومين مع واحد صاحبى على الموضوع ده
وعلى فرحى وهيبقى عامل ازاى وكده
انا بقى فرحى اللى هو اجمل فرح ممكن احضره ان شاء الله
ده ان اتجوزت .. وان عملت فرح
هيكون فرح كبير الناس فيه كتير .. وكلهم فرحانين
بياكلوا ويشربوا وينشدوا ويشيلونى ويهبدونى
ويسبونى فى الاخر ويقولولى مع السلامة

بتراعي كلام الناس والقيل والقال ؟ ولو اه او لا قول ليه؟
اكيد طبعا .. بس مش فى كل الاوقات
ولازم تكون صورتى كويسة قدام كل الناس اللى يهمونى
او اللى بتعامل معاهم على الاقل
ليه بقى ؟ عشان الناس لازم تفهمنى بالصورة اللى انا اقصدها
ولازم يعرفوا انا عملت دى ليه واشمعنى دى
ده غير انهم لازم يثقوا فى اللى بيتعاملوا معاه ده

صحيت من النوم ملقتش الموبايل ولا الكمبيوتر ولا الكاميرا الديجيتال ورجعنا لعصر الحمام الزاجل والحصنه هتكون سعيد؟
هفرح جدا .. انا بدور بقالى كتير
على مكان يكون بدائى جدا
حتى ميكونش فيه كهربا
عشان نفسى بجد
اعيش يومين فى حته زى دى
لكن اظن انها لو بقت لمدة طويلة ممكن اتعب

عندك امل ؟ اسبابك؟
اكيد عندى امل
لانى من غير اكمل ومن غير هدف مش هعرف اعيش ومش هعرف امشى فى حياتى
بس ممكن يكون حلمى واملى غير معلنيين
او محدش يعرفهم .. ومش لسبب .. بس كده


لما بتحب تهرب من كل شيء بتروح فين ؟
بقعد لوحدى .. او بنزل امشى لوحدى
او اقف على النيل .. اقف فى حته محدش يعرفنى فيها
او اكلم حد قريب منى احكيله همى .. بس دى بتبقى مرحلة تانية
بس دى مرحلة اخيرة خالص .. لانى لم اعتاد انى اهرب من حاجة اصلا

امتي اول مره خدت فيها نفس طويل وقلت ياه دا انا كبرت ؟
من ساعة ما اتولدت
او من ساعة ما فهمت الدنيا وانا بقول انا كبير
ودى حاجة والدى ربانى عليها

بتشرب سجاير ؟
لا الحمد لله مش بشرب ومش بطيق ريحتها كمان

وايه شعورك لما ست او راجل بيشرب سجاير وليه؟
بتعبله نفسيا وجسديا ولو ينفع اكلمه اكيد هكلمه
حتى لو مين .. بس برضة بكلمه

ليه .. دى بقى عشان انا بشفق عليه وعلى صحته
فضلا عن كونها حرام ولا تجوز

بتعرف ايدك اليمين من الشمال ازاي ؟
انت اكيد بتهزر
تعرف ان الموضوع ده انا فعلا بعانى مشكلة منه
انى فى بعض الاوقات مش ببيقى عارف ايدى اليمين من الشمال
بس لما ببدا اتلغبت
بشوف انا بأكل بانهى ايد
وبقول دى ايدى اليمين ويبقى التانية هى الشمال


ايه اكتر اله موسيقيه بتحبها ؟
والله مليش فى حكاية الالات دى
لكن عامة انا بحب الاناشيد جدا .. حتى اللى فيها موسيقى
ما دام الانشدي بيهدف خلاص

ايه الحاجه اللي لو حصلت هتبقي سعيد اوي ؟
جوزونى .. وانا هبقى اسعد واحد فى الدنيا

لا بجد .. لما احس ان الاسلام رافع رايته كده فى العالم كله
اكيد دى اكتر حاجة هتسعدنى
لما الى فى المسجد الاقصى .. اكيد دى حاجة هتسعدنى
لما ادخل الجنة .. اكيد هكون طاير من الفرح


تحب يبقي عندك ارض زراعيه ولا عربيات ولا كام عماره ولا فلوس في البنك ؟
كلها دى حاجات دنيوية .. وانا من الناس اللى بتزعم انها طلاب جنة وطلاب اخرة
مش طلاب دنيا

البحر ولا النيل ؟
انا طماع .. عايز وبحب الاتنين
بس البحر اكيد بحبه اكتر
كنت لسة بنتكلم اليوم مع اختى بقولها انى عايز اسكن فى مكان
تبقى البلكونة بتاعته بتطل على بحر او نيل

مركب ولا طياره؟
مركب .. عشان الواحد يعرف يتأمل فى الطبيعة اكتر


مجنون ولا عاقل ؟
انا مجنون .. وبعترف بكده
بس فى بعض الاوقات ببقى عاقل ... يلا عدوها كده
واللى يعرفنى كويس هيعرف انا اقصد ايه


تقرا كتاب ولا تتفرج علي فيلم ؟
لو الكتاب شدنى .. او عن حاجة تفيدنى يبقى الكتاب
لو غير كده .. يبقى الفيلم .. والكتب يتأخر شوية
بس بشرط يكون الفيلم هيقدملى حاجة


تمرر التاج ده لمين؟
امرر التاج لحد .. على فكرة ده اصعب سؤال فى اى تاج

طيب ابعته
شقلبان .. قضيها
محمد .. عدى النهار
عمر .. سلامتك يا دماغى
وضاح .. لافتات

البنات بقى ممكن ارحمهم من التاج ده وابعته

الاختنان ويسبر وفلونا .. البازل الغريب بتاعهم
الاخت المجاهدة .. جسر التواصل
الاخت روعهـ .. طيف

كفاية كده عشان محدش يضربنى




اعدكم زوار مدونتى العزيزة انى هرجع تانى وبقوة للمدونة ان شاء الله
عندى مواضيع كتير هتكلم وهقول فيها
بعد التاج ده ان شاء الله


الخماسى وايامهم الجميلة
حبيبتى اللى نفسى اروحلها
اعملها ولا استنى


ومواضيع تانية كتير .. ان شاء الله هتلاقى اعجابكم

15 comments:

saiaf said...

حمد الله على السلامة

التاجة ده مش عارف ... ؟
ايه الهدف من اسئلته يعنى ؟

Anonymous said...

جميل يااسلام

اجابتك متميزة


ربنا يوفقك


وعودا أحمد الى المدونة

Manas

amar hedar said...

عودا احمد يا اسلام

اجاباتك متميزه كالعاده

ربنا يوفقك يا ريس

فوضى منظمة said...

عودا حميدا يا بن توفيق .. وتاج جميل .. ومستني البوستات الجاية

Anonymous said...

جميل اوى يا استاذ إسلام وما تخافش هراضى أستاذ عز بالنيابة عنك
بالتوفيق إن شاء الله ونشوفك رئيس تحرير بس فى جريدة مش موقع وساعتها لو سمحت عينى عندك حتى لو بالقطعة
لمياء شرف

Unknown said...

ربنا يبارك فيك اخي الحبيب وحمد الله علي السلامه رغم اني اول مره ازورك وجزاكم الله خير

Rehab Saber said...

ولكم باك :)

بن توفيق said...

سياف حبيبى الله يسلمك
انا عارف ان الاسئلة مش اللى هى ومش اللى تعحبك
بس معلش استحمل شوية


مانص عيونى دايما بتحرجنى بذوقك
واحمدده واحد صاحبى مش انا


شاهد باشا
ربنا يكرمك ويعزك

بن توفيق said...

شاهنشى
حااااضر مش هتأخر ان شاء الله
قبل نهاية الاسبوع هتلاقى بوست جديد ان شاء الله


استاذة لمياء
ربنا يكرمكيا رب
واعدك لما امسك رئيس تحرير جريدة ان شا ءالله ابقى اعين حضرتك


اخونا الفاتح الجعفرى
اهلا بيك فى المدونة اللى نورت بوجودك


استاذة كات واياكم

نقطة مية said...

ياااه ده مش انا بس اللي كنت منقطعة..هي عدوى بين المدونين ولا ايه...
حمدلله على السلامة..ويارب يصلح الحال..في انتظار جديدك دائما
تحياتي

محمد said...

حمدا لله على سلامتك

ليه كدا ياعم إسلام؟

دي كلها غيبة ؟

عموما نورت من تاني

شكرا على التدبيسة

أرد عليه في أقرب وقت بإذن الله

Anonymous said...

عود أحمد يا ريت متنقطعش تانى بس بما لا يخل بالمذاكرة

Bent Elqran said...

طال الإنتظار

عودا حميدا

بن توفيق said...

اختنا نقطة مية
انا رجعت اهوه الحمد لله
عايزين كل الناس ترجع هى كمان بقى

وضاح باشا
ربنا يكرمك ويعزك يا رب
ومستني اجاباتك


استاذى اللى مذكرش اسمه
حااااضر مش هنقطع تانى .. وهذاكر


اختنا بنت القرآن
ربنا يكرمك يا رب

mosaferfel7ayah said...

سلام عليكم
بصراحة يا بن توفيق انا مش داخل علق مخصوص على التدوينة
بقدر ما انى امد يدى بالسلام
للتعارف

صحيح انا لسه مدون جديد
ومدونتى بسيطة بسيطة
ويادوب بعرف افتحها واكتب فيها

بس يمكن تلاقى انك عرفت
انسان , او واحد بيحاول يكون انسان

مسافر