يا ترى ايه اللى هيحصل

فى البوست اللى فات اشدت بدور القضاء المصرى ومصداقيته ونزاهته
وصدقت فعلا ان فيه فى مصر قضاه .. لا يخافون الا اللى خالقهم وبس

لكن بعدها بكام يوم وتحديدا يوم 19 مايو الحكومة تطعن فى قرار مجلس الدولة

وقالت ان القرار ده لاغى وغير مسئول .. ده لان بس رئيس الججمهورية هو اللى كان اصدر القرار الاولانى

المهم .. اتشكلت اللجنة اللى كان تشكيلها غريب واشخاصها اغرب .. لكن ماشى

وصدر القرار اللى عايزاها الحكومة بقبول الطعن وتحديد جلسة يوم 3 يونيو

كل ده بيحصل وانس وخديجة ملك فى فترة الامتحانات

كل ده بيحصل وسارة ايمن عبد الغنى بتبكى ابى هترجع امتى

كل ده بيحصل ومعاذ شوشة بيدعى ويقول يا رب طلع بابا

كل ده يحصل وصفيه محمود ابو زيد بتبكى وحشتنى يا بابا

ويطلع ظابط امن الدولة فى حوار يعلن عنه محامى المعتقلين

الاستاذ عبد المنعم عبد المقصود

ويقولهاله باللفظ " انا غلطان انى اجلتها لـ 3 يونيو " وصل بيه الجرئة لانة يقول كده

تفتكروا يوم 3 يونيو ايه اللى هيحصل .. يا ترى هيبقى فيه حكم ؟

عشان الحكومة تخلص من الدوشة بتاعت المحالين عسكريا دووول

او حتى يبقى فيه حكم للكبار مثل المهندس الشاطر والاستاذ حسن مالك والدكتور بشر

ويا ترى لو بقى فيه حكم .. هيبقى بقد ايه ؟ 3 ولا 5 ولا 7 سنوات

انا والله مش متشائم .. ومش ببشر على حد خالص .. يا رب فك اسرهم يا رب

بس الواقع ممكن يكون بيقول كده خصوصا بعد طعن الاخوان وصدور حكم مجلس الدولة

والدوشة والازعاج اللى سببهم الطعن والحكم للحكومة

طيب ممكن الحكومة تلعب لعبة اكبر شوية .. وتدى حكم اكبر من 7 سنوات وتبقى ساعتها فتحت فتحة عليها وعلى الجماعة

طيب يا ترى رد فعل الجماعة هيكون ايه ؟

اسئلة كتير بتدور فى بال الواحد .. يا ترى اجابتها هتكون يوم 3 يونيو ولا هتتاخر شوية

اللهم فك اسر المعتقلين .. وردهم الى اهلهم سالمين

اللهم آمين