هو اول تاااج يوصلنى .. كان وصلنى تاج قبل كده واعتذرت عنه
بس لما يجيلى التاج من حبيبى واخويا شرقاااوى وفيه من وراه عزومة سمك
من محمود سعيد لازم اجرى واجاوب عليه
طبعا انا مش جريت خااالص .. شرقااوى باعتلى التاج ده من يجى اكتر من اسبوع
وانا كنت اول واحد معلق على التاج بتاعه بس لظروف خارجة عن ارادتى اتأخرت في نزوله
من هو:احب شخص لقلبك فى الدنيا؟
من غير زعل .. اختى طبعا
انسان مستعد تضحي بحياتك –ركز فى كلمة حياتك- عشانه؟
هركز جااامد قوى .. وبرضة هقول اختى
اسم أول حب؟
ياااااااااااه .. انت قديم قوى انا اول ما نزلت الدنيا حبيت امى عشان هى اللى كانت بتاخدنى فى حضنها وتأكلنى وتخلينى معيطشوتغيرلى وتحمينى والكلام اللى انت عارفه ده
اسم اخر حب(حتى الان)؟
ابويا .. بعد ما عرفت انه هو اللى بيربينى وبيصرف عليا .. انت بتتكلم ازاى
انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟
لو عايز بالوصف ده .. يبقى انا عايز اعمل كده فى كل محتل لارض الاسلام وكل واحد بيحارب الاسلام
ما هو اسم أجمل كتاب كتبه بشر قرأته ومحتفظ به حتى الان ؟
كان كتاب بتاع الاستاذ عمر التلمسانى .. اسمه الملهم الموهوب وكتاب لا تحزن .. بتاع الشيخ عائض القرنى
اسم كتاب-كتبه بشر برضة- انت متعلق بيه وبتقرأه كل فترة؟
كتاب اسمه ماذا يعنى انتمائى للدعوة .. كتبه الاستاذ محمد عبده
شىء تحس بالراحة النفسية عندما تنظر اليه ؟
كتاب ربنا .. القرآن لما حتى ابص فيه بس من غير ما اقرأ لا والله لو شايله بس فى ايدى وانا ماشى .. بحس براحة نفسية عالية جدا
مكان تحس فيه بالحنين الى شىء لا تدرى ماهو و ذكريات جارفة الى لاشىء ؟
تخيل لما تكون فى مكان .. انت اصلا مرحتوش قبل كده بس حاسس بكل ركن فيه .. بكل طوبة محطوطة ازاى .. بكل حبة تراب موجوده فيه هو ده المكان انى لما احب اسرح باسرح فيه او لما احب اعيش مع نفسى اروحه
طبعا المكان ده مش موجود غير فى خيالى .. وقد لا يوجد بعد ذلك
طبعا المكان ده مش موجود غير فى خيالى .. وقد لا يوجد بعد ذلك
مكان تحس بالراحة عندما تدخله ؟
المسجد .. بحس لما بدخله انى واحد تانى
اجمل مدينة زرتها داخل مصر ؟
انا ملفتش فى محافظات مصر كتير يعنى هى الاسكندرية ودمياااط و جمصة وبس
بس الاسكندرية هى الاجمل من وجهة نظرى
وعلى امل واشتياق انى اسافر الغردقة والاقصر واسوان قريبا ان شاء الله
وعلى امل واشتياق انى اسافر الغردقة والاقصر واسوان قريبا ان شاء الله
أجمل مكان طبيعي رأيته داخل مصر؟
قاعد على البحر وقت الغروب وجمبى قلعة قايتباى كان منظر اكثر من رائع بجد
اهم جهاز منزلى انت متعلق بيه او بتستخدمه كتير ؟
اللى قاعد عليه وبكتب من عليه الاجابات وبرفع من خلاله البوست ده
اللى قاعد عليه وبكتب من عليه الاجابات وبرفع من خلاله البوست ده
نوع هاتفك المحمول؟
ليه الاحراج ده .. معايا طبعا نوكيا لازم يعنى نوكيا كام ؟ طيب هو نوكيا 3100
سرعة بروسيسور جهازك ؟
مش بقولك احراج بس هى 2.4 بس ادعيلى انى ازوده
حجم ذاكرة –هارد- جهازك ؟
انا غلبان هاردى 80 جيجا بسالحمد لله طبعا .. عندى كمان هارد تانى 40 بس مش حاطه فى الجهاز
المساحة التى تشغلها المواد الاسلامية على جهازك ؟
مش عارف والله ومش حسبتها ومأظنش انى فكرت فى يوم انى احسبها
بس تقريبا كده انا عندى حوالى 10 جيجا مش اسلامى والباقى اسلامى
نفس المساحة السالف ذكرها فى قلبك-الاجابة لنفسك عشان الرياء يا اخواننا ؟
ما انت قلت اخلاص .. ومفيش رياء .. مش هرد يعنى
أهم هدف انت واضعه لحياتك دلوقتى ؟
انى اقدر اتعايش واخلط واتعامل مع كل الناس وانجح واتفوق واشتغل سيبك من الجواز دلوقتى
مواصفات فتاة –أو فتى للبنات- الأحلام بالنسبة لك ؟
مش بقولك سيبك من الجواز اليومين دووول مواصفات ايه اللى انت بتتكلم عليها هو الحديث بيقول ايه ؟" تنكح المرأة لاربع لمالها وجمالها وحسبها ودينها "انا بدور على الاربعة دووول لو لقيت حاجة قولى انا على فكرة واخد وعد من والدة احد افراد الرباعى بلاش ذكر اسمه ... ان والدته هتجوزنا احنا الاربعة وهتجيبلنا عرايس .. صح يا شرقاااوى
صف ما يأتى :شعورك لما بتسمع كلمة مصر؟
هقول كلمات الاغنية بتاعت عبد الحليم اللى بتقول فيها
بحبها وفى قلبى ساكن حبها
شعورك لما بتسمع كلام عن اليهود ؟
بفتكر ان الاسلام عزيز ... والفجر ان شاء الله قريب
شعورك لما بتشوف ظابط شرطة ؟
بشفق على بعضهم .. ومش بحب البعض الاخر
شعورك لما بتشوف الكناس العجوز فى الطريق ؟
بحس بمدى الم الشعب المصرى الكادح
لون البطانية اللى بتتغطى بيها فى الشتاء ؟
احمر غامق .. ممكن تقول نبيتى
لون الجورب-الشراب- المفضل لديك ؟
الابيض غالبا هو الافضل بالنسبة لى
احساسك اذا داست قدمك فى الطريق على مخلفات اخراج حيوان- *** ولا مؤاخذة- ؟
ولامؤخذة ليه .. بحس بقيمة النعمة اللى ربنا انعمها عليا .. وهى نعمة البصر
افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف ؟
كل واحد بيسد ثغرة للاسلام .. ربنا معاه ويوفقه
احساس يراودك فى اشارة مرور مغلقة بسبب مسئول كبير؟
بحس بمدى معاناه الشعب والظلم اللى وقع عليا نتاج مصالحى اللى متعطله
اخيرا التاج خلص .. ده كان تاج جملىبس كله يهون عشان عزومة السمك .. ولا ايه يا محمود يا سعيد
طيب احدفه على مين
احدفه على انهى مدونة
ولا اقولكم مش مهم .. الامتحانات على الابواب وخلى الناس تذاكر
15 comments:
جميل
ربنا يرزقك ببنت الحلال
أي خدمة .. بدعيلك ببلاش
:)
............
ليه الزعل بس
أنا تعبت من
Word Verification
بجد بتعذبوني
فى البداية ببارك لك يا بن توفيق على المدونة:)
و ان شاء الله تكوين تدويناتها فى ميزان حسناتك:)
انا اسف هى جت متأخرة بس خير ان شاء الله :)
بالنسبة للتاج فهو جميل من صاحب لصاخبه
و الردود فيه واقعية و محستشى انها مثالية زيادة عن اللزوم
ربنا يبارك فيك
:)
السلام عليكم
السلام عليكم ورحمه الله
ربنا يبارك فى حضرتك اخ بن توفيق
اجابات حضرتك كنت منطقيه وكنت حاسه
انها بتطلع بدون تفكير
ربنا يرزقك الاخلاص..
السلام عليكم .
ياسيدي إحمد ربنا
أنا هاردي 20
وبروسيسور 1
إحمد ربنا بقى :D
وبعدين لو إتجوزت إبقى شفلي معاك الله يكرمك ..
التاج ده جالي
بس طوييييييل اوي
انتا كتبت الاجوبة في كام يوم
السلام عليكم ورحمه الله وبركاته
مع إنى مش بحب جو المدونات لكن الراجل لسه كاتب عليا كلمتين حلوين فقلت لازم على الأقل أدخل أديله تعليق
ربنا يعزك يا بن توفيق ويوفقك ويخليك لينا
بس إيه الكلام الجامد دا؟؟أنا مقدرش على كده
وبعدين إيه حكايه العروسه دى إحنا مش إتفقنا
وبعدين حوش علشان تغير الموبايل بتاعك وتجيب هارد كبير وتزود سرعات الكمبيوتر إللى إنت مش بتقوم من أدامه ... مش تقولى عروسه
بس هو إيه حكايه التاج دا هو بيلف على كل المدونات
الكل مبعوتله التاج دا
حمداً لله إنى مش عامله مدونه
وبعدين بطانيه إيه؟؟
الشتا خلصت المفروض إللى بيسأل يقول
بتنام فين وإزاى فى الصيف؟؟
علشان تكون الإجابه فى البلكونه على السيراميك... كده
لا لا لا بس بجد تاج جميل وإجابات حقيقيه مقنعه
وبالتوفيق للجميع
أختك أحب شخص لقلبك وإللى هتضحى بحياتك علشانها
vsما شاء الله
بارك الله فيك
اكتر رد عجبنى ده
شىء تحس بالراحة النفسية عندما تنظر اليه ؟
كتاب ربنا .. القرآن لما حتى ابص فيه بس من غير ما اقرأ لا والله لو شايله بس فى ايدى وانا ماشى .. بحس براحة نفسية عالية جدا
ربنا يكرمك
سلام عليكم
جميله قوى المدونه دى
بتدخل فى الشخصيه من كل جوانبها
وكل متعلقات الحياه الخاصه بالفرد
وبتدينا انطباع جاد لمواصفات الفرد
وسلوكياته وفلسفته الخاصه تجاه كثير من
امور الحياه .
على فكرة انت من الشخصيات اللى بحبهم
فى المنتدى واحب ارائهم ونقدهم
واسلوبك عجبنى فى الكتابه .
نرجع للمدونه
ارائك كلها جميله وتنم عن شخصيه مصريه
لابن بلد عاوز يغير فيها للاحسن
يرفض الظلم والقهر ولايخاف من جور الحكام
ينقصنا ان ننمى روح الانتماء بين الناس
وان يبتعدوا عن الامبالاه ويشتركوا فى
وضع حدود لحياتهم ومصالحهم
وان يدافعوا عنها بكافه الطرق
ان يكون لهم منهج وطريق للحياه الكريمه
يصراحه الموضوع يستحق ان نفرد له
صفحات كثيرة لان الكلام كثير وما بالقلب اكثر
احييك على المدونه
ولك خاص تحياتى
اخيك / على جاد .
مين
أنا
أمتى
أنا إيه اللى جابنى هنا
طيب انتوا عارفين بقى أن أنا مبحبش السمك
وكويس أنك مبعتهوش لحد لحسن الظاهر شرقاوى نشر أن ده تاج بالسمك :-)
يا عينى
على فكرة انا هانضم للرباعى ده علشان عايز اتجوز
بس ايه يا عم الاجابات الدبلوماسية ديه
يلا مش مهم
انى احبك فى الله
اجابات حلوه بجد
خاصه بتاعه نعمه البصر دى
أنا اعرف فوائد كثيرة للمدونات ولكن لم أكن أعلم يوما أنها بتجيب عزومات وسمك كمان.
لو كنت اعرف كده من زمان
برده ما كنتش دخلت عالم التدوين لانى مش أكيل سمك
اجابات جميلة يا اسلام ونتمنى ان نشوف الرباعى ايه متجوز فى يوم واحد
---
رجاء أخير حار شيل موضوع الكلمة اللى لازم اكتبها علشان يحط التعليق، لأنه بيتلكك ويقول الكلمة غلط رغم انها مكتوبة صححححححححح والحمد لله على نعمة البصر وكمان نعمة النظارة
ربنا يكرمك
اعجبتنى الكثير من الاجابات
اعجبتنى علاقتك باختك :)
ربنا يخليكم لبعض وميحرمكوش من بعض ابدا
تعليق متأخر اوى انا عارفة.. بس لسهه شايفة البوست حالا
:)
اجابات حضرتك واقعية ماشاء الله
اكتر اتنين عجبوني علاقتك باختك و القرأن انه اكتر شئ بيريحك
:)
ربنا يكرمك يا اخي
:)
Post a Comment