خطوة على الطريق

الطريق طويل .. ومحدش هيوصل لنهايته
الا لما يبدأ بالخطوة الاولى

الخطوة الاولى دى هى اللى هتشده وتديله الدفعة الى انه يكمل فى الطريق

عشان يوصل فى الاخر لبر الامان او للنهاية

يا ترى النهاية اللى احنا عايزينها دى ايه ؟
النهايات كتير
واحد بيفكر يكون اخر طريقه انه ياخد البكالريوس او ياخد الليسانس ويشتغل بيه
واحد تانى بيفكر ان اخر طريقه هى زوجة صالحة واولاد يربيهم تربية اسلامية ينفع بيهم الاسلام
واحد تالت بيفكر تكون نهاية طريقه منصب يشغله ويجمع من خلاله الشهرة والمال
واحد رابع بيفكر تكون نهاية طريقه انه يكون مبسوط .. فاى حاجة تبسطه هى دى نهاية طريقه

وواحد عايز تكون نهاية طريقة جنه .. ينعم فيها
جنه يجد فيها ما لا عين رأت ولا اذن سمعت ولا خطر على قلب بشر
جنة بها لبنة من ذهب ولبنه من فضة
جنة ملاطها المسك وحصباؤها اللؤلؤ
جنة سقفها عرش الرحمن
جنه انهارها من العسل واللبن
جنه بها الحور العين

دى الجنة اللى المفروض تكون نهاية طريقنا كلنا .. ودى اللى انا بتكلم على طريقها دلوقتى

الرسول صلى الله عليه وسلم بيقول : ان لربكم فى ايام دهركم لنفحات .. الا فتعرضوا لها
واكبر هذة النفحات ستطل علينا بعد ايام قلائل



وهو اكبر خطوة واعظم خطوة فى العام
ربنا يعطينا 30 يوم نفحات
فيه تفتح ابواب الجنه
فيه تغلق ابواب النار
فيه تصفد الشياطين
كل يوم 70 الف واحد يعتق من النار
النافله بفريضة
الفريضه بـ 70 فريضة
فيه ليلة تعدل عبادة اكتر من 83 سنة

هى دى الخطوة اللى بتكلم عليها
هنتقدم فى الخطوة دى عشان نوصل لجنة عرضها السماوات والارض

ولا هيعدى علينا رمضان .. ومش هناخد الخطوة اللى على الطريق ده
وساعتها يتحقق فينا قول النبى صلى الله عليه وسلم : خاب وخسر من ادرك رمضان ولم يغفر له

اخر حاجة .. العربية لما بتيجى تمشى بتطلع على الاول
وبعد كده التانى وبعد كده التالت والرابع
عشان تمشى بسرعة
لو بدأنا فى الاول .. مع بداية رمضان هنوصل للرابع فى العباده فى اخر رمضان
وساعتها هنكون ضيعنا على نفسنا الخطوة دى والثواب ده
لكن لو بدأنا دلوقتى فى الاول .. نيجى على بداية رمضان فى التالت والرابع
فان شاء الله نلحق الخطوة .. ونلحق ثوابها ان شاء الله

اسيبكم دلوقتى .. واشوفك فى حلقة تانية عن رمضان
وازاى نستثمر الخطوة دى عشان نوصل للجنة ان شاء الله